Gaurko egunez, EHEk aldarrikapen ekimena burutu du Baionako karriketan zehar bertako
hizkuntzaren ofizialtasuna aldarrikatzeko. Iaz bezala, aurten ere herritarrek bat egin
dute EHEren deialdiarekin eta euskaltzale andanak hartu du parte San Andres plazatik
atera den mobilizazioan. Baionako besten giroari jarraiki, umore ukitua protagonista izan
da Baionako Herriko Etxea jomugan izan duen parodiaren baitan, baina ezin ahaztekoak dira
bertan botatako aldarrikapenak.

Izan ere, Baionako Herriko Etxeak eta Jean Grenet bertako auzapezak aurrera daramaten
hizkuntza politikak euskararen aurka doaz, ezbairik gabe, eta bertako hizkuntzaren
normalizazioa baino euskararen galbidea dute helburu.

Alta, karriketako izendegietan euskarazko lau hitz agertzeaz gain, Baionako Herriko
Etxean nekeza da euskaraz bizitzeko aukera urrienarekin topo egitea ere; zerbitzu guztiak
frantsesez eskaintzen dira, bestetako egitarauan ere euskararen presentzia anekdotikoa
da, herriko etxearen eta herritarren arteko harremanak, erdaraz soilik egin daitezke.
Baina Euskal Herrian egon arren, ez da harritzekoa funtzionamendu osoa erdarazkoa duen
herriko etxe batean euskara hain baztertua ikustea; eta are gutxiago bertako agintari
gehienak eta batez ere horien buru Jean Grenet analfabeto hutsak direla ikusita. Hala,
eta euskararen normalizazioa burutu dadin interesik ez dutenen aldetik, nekez hartuko
dira hizkuntza eskubideak bermatuak izan daitezen neurri eraginkorrak.

Baionako herriko etxea, beste askorekin batera, euskararen normalizazioaren eta
ofizialtasunaren aurkako eragile aktiboa da. Hala ere, Baionako herriko etxeak,
Euskararen Erakunde Publikoarekin (EEP) izenpetutako akordioaren bitartez euskararen alde
dagoela erakutsi nahi izan du, euskaldunon hizkuntza eskubideen urraketa etengabearen
aurrean duen arduragabekeria ezkutatu eta beren aurpegi instituzionala garbitu asmoz.

EEPk hartu duen jokabide berbera da hori. Finean, Estatu frantsesaren tresna da eta
guztiok ezaguna da estatu frantsesak hizkuntza gutxiagotuekiko duen jarrera jakobinoa.
Aurten, eta kostata gainera, Frantziako Estatuak euskara frantsesen ondare gisa onartu du
konstituzioaren baitan, baina euskarak ez du behar inora ez daraman keinu antzurik.
Euskarak lege babesa behar du beren lurraldean, euskararen ezagutza eta beren transmisioa
bermatuko duten hizkuntza politika euskaltzale eta eraginkorrak, Euskal Herria
berreuskalduntzeko bidean euskaraz bizitzeko espazioak sortu eta garatuko dituen
politikak eta euskaldunon hizkuntza eskubideak bermatuko dituzten ordenantza eta arauak.

Baionako Herriko Etxean irudikatzen den egoera iraultzeko, euskaraz biziko den herria
gauzatzeko beharrezkoak diren neurriak hartu eta indarrean jarri behar dira, Baionan
bezala, gainontzeko herriko etxeetan zein administrazio guztietan ere. Euskarak funtzio
guztiak bete behar ditu. Lan hizkuntza izatea ezinbestekoa da, baina horretarako langile
guztiak euskaldunak behar ditugu. Administrazioetako arduradunak, politikariak, eta
beste, euskaldunak izan behar dira. Herri osoa euskaldundu behar dugu eta hori gauzatu
ahal izateko administrazio ezberdinek neurriak hartu behar dituzte. Euskarak lege babesa
behar du. Lege berri bat, zeinak Euskal Herria bere osotasunean aintzat hartuko duen,
lege bakarra, beraz, Euskal Herrirako. Euskaldun guztien hizkuntza eskubideen bermea
izango dena.

Ofizialtasuna eta lege babesa behar ditu euskarak euskaldunon hizkuntza eskubideak
errespetatuak izan daitezen. Baina ofizialtasunarekin soilik euskarak ez du egingo
aurrera. Administrazioen aldetik esparru guztietan euskarari lehentasuna ematea
ezinbestekoa da Euskal Herria berreuskalduntzeko bidean. Hizkuntza sumisioarekin apurtuz,
menpeko status eta hizkuntza politiken aurrean euskaraz bizitzeko hautuari eutsiko diogu
eta hizkuntza politika burujabea garatzeko eskubidea aldarrikatuko dugu; euskara, geurea
delako, Baionakoa, Euskal Herrikoa.


Udako kanpaina

Gaurko ekimenarekin, EHEk Euskal Herriko herri, auzo, txoko eta bazterretara hedatzen ari
den dinamikan beste urrats bat eman du. Izan ere, udari begirako kanpaina abiatu du EHEk
aurtengoan ere, "Euskaraz biziz, Euskal Herri euskalduna eraiki!" lelopean. Euskal
Herriko hiri, herri, auzo, kale, plaza, errepide eta zubiak euskaraz bizitzeko eta Euskal
Herri euskalduna eraikitzeko hautuaren aldeko mezuez josten ari dira hainbat eta hainbat
euskaltzale, uztailean iragarri genizuen bezala.

{mosimage}