Hiriko hizkuntza paisaia euskalduntzeko dinamikak aurrera darrai.
Iruñeko hizkuntza pasaia euskalduntzeko orain dela lau urte abiatutako lanari jarraipena ematen ari zaio Iruñeko euskalgintza. Herritarren bulkadari esker, hizkuntza paisaian hainbat aldaketa egitea lortu ondoren, oraingoan, hiri sarreretako gaztelania hutseko panelak euskalduntzeko ekimena abiatu dute.
Ekimenaren bitartez, hirira sartzen dena, Pamplonara baino Iruñera sartzea nahi dute Kontseiluaren baitan biltzen diren AEK, EHE, IKA, NIE, AET eta Sortzen-ek. Iruñea hiri euskalduna dela ezkutatzen duten panel horiek aldatzea da helburua. Herritarrak jo dituzte aldaketaren giltzatzat.
Ekimenaren baitan, herritarrei deialdi desberdinak egingo zaizkio eskaera egin dezaten. Herritarrek euren eskera agertzeko bi modu desberdin izango dituzte; batetik, IRUÑEA panel ibiltariaren aurrean argazkia egitea eta hiri sarreretako panelak euskalduntzea eskatuz sinadura ematea.
Hori egin ahal izateko, hauek dira hurrengo hitzorduak: azaroaren 29an Xatur Deuna egunean, abenduaren 3an Nafarroaren egunean, abenduaren 13an Txantreako egunean eta abenduaren 20an Mendillorriko egunean. Egun hauetaz gain, Iruñezar eta Campion euskaltegietan ere izanen da argazkia egiteko aukera.
Aipatu hitzorduetan panelarekin batera sinadurak ere bilduko dira. Bestalde, AEKren eta IKAren euskaltegietan eta Karrikiri euskal dendan ere horretarako aukera izanen da. Nahi izatekotan, interneten ere eman daiteke atxikimendua, www.irunekoeuskalgintza.org helbidean. Jasotako sinadurak Parlamentuan aurkeztuko dira.
Iruzkinak
Egin zure iruzkina
|
Euskaraz bizi sarean