Baxoa euskaraz egiteko eskubidea aldarri duten ikasleek Colette Capdevielle, Frantziako Alderdi Sozialistako parlamentariaren babesa jaso dute. Aipatu parlamentariak gutun bat bidaliko dio Frantziako hezkuntza ministroari Bernat Etxepare lizeoko ikasleen aldarrikapenak jasoaz eta hark, lau hilabete izango ditu erantzuteko. Ikasleek irailean jarritako presio dinamika are gehiago indartzeko balioko du atxikimendu honek.

Hutsean geratzeko aukera asko dituen aurrerapauso txiki hauek azkenaldian ematen ari den eraso-katearen baitan ulertu behar ditugu. Erasoen adibide argi bat aipatzearren, hor dugu ikastolen afera.  Hendaiako ikastola berriaren proiektuarekin 1850eko «Falloux legea» berpiztu zuen suprefetak, eta geroztik Lapurdi, Nafarroa Beherea eta Zuberoako ikastola guztiak kinka larrian jar ditzake Estatuak.

Aipatu berri ditugun hiru lurraldeetako euskal ikasleek urteak daramatzate Baxoa euskaraz egiteko eskubidearen alde lanean. Beraien ikasketa prozesu osoa euskaraz eginagatik, frantses estatuan Goi Mailako ikasketak egin ahal izateko gainditu beharreko Baxoko azterketak erdaraz egin behar izaten dituzte. Matematika eta Historiako azterketak euskaraz egiteko aukera lortu badute ere, azterketa oro euskaraz egiteko eskubidea aldarrikatzen dute, beti ere eskola euskalduna helburu.

Borroka horren baitan, presio dinamika berri bat jarri dute martxan aurtengo ikasturtean. Agintariek euskaraz ikasteko duten eskubidea errespeta dezaten, Bordaleko errektoreari ikasle bakoitzak egunero gutun bat bidaltzen dio.